(1925) A mi hija Pura en su primera comunión
Meñaquina mía, ñube de blancura,
Hoy que tan maxina vas de comunión,
Yes como azucena, pos te llames Pura
Y más que de nome yes de corazón.
Falopín de ñeve, sol d' á mediu día,
De la ñata espluma, bixu de to pá,
Déxame cantati con la lletanía,
Que p' adormecete cantaba to má:
Anxelin fermosu, flor de los pumares,
Co 'l paxellín blancu d' un aire monxil,
Inda más resplandies que cuantos millares
De malgaritines ñacen por Abril.
Tú la flor del agua, tú la escapitina,
Blanca corderina qu' entama á balar;
Pómpara de plata, yes la palombina,
Qu' encueye la esnala al pie del altar.
L' orbeyada rosa d' ú tría to planta;
Vistes flor de llino, del llino que fós
Pa les camisines que la Virxen Santa
En Belén filaba pa 'l Neñín de Dios.
Candialina neña, del alba fegura,
Hoy que tan maxina vas de comunión
Yes como azucena, pos te llames Pura
Y más que de nome yes de corazón.